Joan den martxoaren 3an, Haur Hezkuntza eta Genero-berdintasuna sustatzea zikloetako lehen mailako ikasleek SIM ROMI Elkarteak emandako prestakuntza-saio aberasgarrian parte hartu zuten. Elkarte hau, ikuspegi feminista eta dekolonial batetik emakume ijitoen eskubideen defentsan eta haien kulturaren sustapenean erreferentziazko erakundea da.
Jardunaldian, parte-hartzaileek, ijito-herria osatzen duten emakumeen esperientzietan arreta jarriz, ijito-herriaren historia, tradizioak eta errealitate garaikideak aztertu zituzten. Prestakuntzari esker, identitatea, generoa eta kultura-kidetza bezalako elementuek, emakume ijitoek egungo gizartean dituzten erronketan eta indarguneetan nola eragiten duten ulertu ahal izan zen.
Gainera, gizarte-partaidetza, ahalduntzea eta aukera-berdintasuna sustatzeko SIM ROMIk bultzatutako ekimenak azaldu zituzten, emakumeek bizipenak partekatzeko, sareak eraikitzeko eta beren eskubideak aldarrikatzeko espazio seguruen balioa azpimarratuz.
