Apirilaren 16an eta 17an, FP Barakaldo LHk, Genero-berdintasuna sustatzea zikloko irakasleen II. Estatu Topaketa hartuko du. Topaketa honetan, zikloaren erronkei eta aukerei buruz kolektiboki hausnartzeko, Euskal Herriko, Kataluniako, Balentziako Erkidegoko, Madrilgo, Zaragozako, Kanarietako, Extremadurako, Andaluziako eta Kantabriako irakasleak bilduko dira. Prestakuntza-proposamen berriak aztertu eta lanbide-profil honek Lanbide Heziketaren barruan duen garrantzia azpimarratuko dugun ikaskuntza-gune partekatua izango da. Guzti hori, gizarte bidezkoagoak eta berdintsuagoak lortzeko bidean aurrera egiteko funtsezkoa baita.
Topaketa eremu feministan eta instituzionalean erreferenteak diren ahotsekin hasiko da. Horien artean, Miren Elgarresta, Emakundeko zuzendaria, berdintasunerako politika publikoetan eta emakumeen eskubideen defentsan ibilbide luzea duena. Inge Gorostiaga Eusko Jaurlaritzako Hezkuntza Saileko Eraldaketa Digitalaren eta Ikaskuntza Aurreratuen Zuzendaritzako arduradunak ere parte hartuko du, hezkuntza-berrikuntzari eta Lanbide Heziketari buruzko begirada estrategikoa emanez.
Nerea Barjola politologo eta ikertzaile feministak sexu-indarkeria, beldurraren eraikuntza soziala eta testigantzak tresna politiko gisa duen garrantzia aztertuko ditu. Indarkeria matxistek gure egunerokoan nola funtzionatzen duten ulertzeko, boterearen mikrofisika sexista ardatz duen bere lana ezinbesteko erreferentzia da.
Era berean, kazetaria, dibulgazio feministako espazioen sortzailea eta eraldaketa sozialarekin konprometitutako aktibista den Irantzu Varela izango dugu. Bere begirada kritiko eta pedagogikoak komunikazioa, berdintasuna eta eskubideei buruzko eztabaida aberastuko du.
Topaketa osatzeko, 2010etik kazetaritza kritikoa, askotarikoa eta urratzailea bultzatzen duen erreferentziazko Pikara Magazine hedabide feminista ere izango da. Honen parte-hartzeak berdintasuna kontatzeko eta diskurtso eraldatzaileak eraikitzeko moduari buruzko ikuspegi berriak zabaltzeko aukera emango du.
Bi egunez, FP Barakaldo LH elkarrizketarako, hausnarketarako eta ekintza kolektiborako gune bihurtuko dugu. Genero-berdintasuna sustatzea zikloa indartzen jarraitzeko eta benetako berdintasuna bultzatuko duen Lanbide Hezkuntzarekin dugun konpromisoa berresteko aukera ezin hobea izango da.
